ايه هي أنواع التقويم الرئيسية؟

التقويم بينقسم لنوعين، تقويم متحرك وتقويم ثابت.

أولًا، التقويم المتحرك:

التقويم المتحرك اللي ممكن المريض بسهولة يركبه ويشيله بنفسه مع اتباع تعيمات بسيطة جدًا من دكتور الأسنان.

لكن ميزة أنه سهل التركيب والقلع بتعتبر في نفس الوقت من العيوب، لأن مدة التقويم لازم تستمر فترة كافية (متوسط من شهرين لـ 28 شهر على حسب حالة الأسنان) علشان يوصل المريض لأفضل نتائج، ولو كل شوية بيستسهل المريض خلع التقويم دا هينعكس بالسلب على كفاءة التقويم وهيحتاج مدة أطول.

معنى كدا أن التقويم المتحرك هيكون غير مناسب تمامًا للأطفال بسبب صعوبة التزامهم بتركيب التقويم طول الوقت وممكن يتخلصوا منه من غير ملاحظة من الأب والأم.

وللأسف النوع دا من التقويم بيكون مناسب لحالات قليلة لأنه بيسبب حركات محدودة للأسنان، يعني نقدر نقول أنه بيعمل تحريك جزئي للأسنان، وبالتالي مع بعض الحالات اللي بتحتاج تنسيق كبير للأسنان علشان تكون مرصوصة بشكل طبيعي هيكون التقويم المتحرك مش أنسب نوع من أنواع التقويم اللي هيفكر دكتور الأسنان في اختياره للمريض.

ايه هي أنواع التقويم المتحرك؟

التقويم المتحرك بيندرج تحته أنواع تقويم مختلفة زي التقويم الشفاف اللي بيكون مصنوع في أغلب الأوقات من البلاستيك وبيتميز أنه تقريبًا غير مرئي، يعني مش بسهولة بيتم ملاحظة أن الشخص عامل تقويم لأسنانه لأنها بتظهر بشكل طبيعي جدًا ودرجة لون مقاربة للون الأسنان الأصلي، وبيتميز كمان بمرونة أكبر من مرونة التقويم المعدني التقليدي في تأقلمه مع الأسنان.

لكن للأسف بالإضافة لعيوب التقويم المتحرك، أن التقويم الشفاف غير مناسب مع بعض الحالات المصابة بأمراض الفم والأسنان زي التهاب اللثة وتسوس الأسنان؛ ونتيجة لدا بيبدأ دكتور الأسنان بعلاج مشاكل الأسنان أولاً قبل تركيب التقويم الشفاف.

ثانيًا التقويم الثابت

انواع التقويم الثابت كلها بتتشابه في تكوينها في وجود جسم معدني وفصوص وأسلاك بتربط الأسنان مع بعض، وفي أن اللي يقدر يقوم بتركيبهم وقلعهم هو دكتور الأسنان فقط يعني مش سهل استخدام المريض للتقويم الثابت بنفسه عكس التقويم المتحرك، وبيتم قلع التقويم الثابت بعد الانتهاء تمامًا من مدة التقويم اللي عادةً بتتراوح من شهرين لـ 24 شهر على حسب حالة الأسنان.

وعلى عكس التقويم المتحرك، هنا هتلاقي أن التقويم الثابت بيسبب تحريك كلي للأسنان ودا بيضيف مميزات كتير للتقويم الثابت عن التقويم المتحرك زي:

  1.  بينتج عن التقويم الثابت نتائج أفضل لأن الدكتور بيكون قادر على التحكم في حركة الأسنان لليمين أو للشمال أو فوق أو تحت بقوة كافية تسمح بإعادة الأسنان لمكانها وشكلها الطبيعي.
  2. كل أطول الأسنان مع التقويم الثابت بتكون متساوية.
  3. شكل قوس الأسنان والفك بيكون متناسق أكتر.
  4. تحكم كامل في شكل كل سن لوحده على مستوى ثلاثي الأبعاد.

أنواع التقويم الثابت

التقويم المعدني

أول نوع وأشهر نوع من أنواع التقويم الثابت هو التقويم المعدني التقليدي، واللي بيحتوي على فصوص معدن منها أنواع كتير زي الصيني والكوري والأمريكي والألماني وغيره؛ وبالإضافة لمميزات التقويم الثابت هتلاقي أن التقويم المعدني بيتميز بسعره الأقل من أنواع التقويم التانية، لكن عيوب التقويم المعدني بتتلخص في شكله غير المحبوب لناس كتير، وممكن يسبب خدوش في اللثة والغشاء الداخلي من الخدين، وأن سهل جدًا يلزق فيه أنواع مختلفة من الأكل وبالتالي خطورة الإصابة بـ تسوس الأسنان بتزيد.

تقويم الأسنان الداخلي

التقويم دا هو نفسه تقويم الأسنان المعدني، وعادةً بيتم استخدامه مع الأشخاص اللي بيعانوا من ازدحام شديد في الأسنان مع صغر حجم الفك، وهنا الفكرة أن التقويم بيتم تركيبه من الداخل بحيث يدفع الأسنان للخارج لحد رجوعها لشكلها الطبيعي بالفك.

ونظرًا أنه بيستخدم في حالات خاصة، هتلاقي أن سعره أعلى شوية من أسعار التقويم المعدني التقليدي اللي بيكون فيه فصوص الأسنان مواجهة للخارج.

التقويم السيراميكي

التقويم السيراميكي معروف بـ تقويم البورسلين، وبيتميز بأن وزنه خفيف مقارنةً بأنواع التقويم التانية زي التقويم المعدني، وله مظهر طبيعي على الأسنان وممكن لا يتم ملاحظته إلا في حالة القرب الشديد من الشخص.

لكن من أشهر عيوب التقويم السيراميكي هي تكلفته العالية، يعني هتلاقي أن أسعار التقويم السيراميكي أعلى من أسعار التقويم المعدني، وغير كدا أن التقويم السيراميكي بيحتاج عناية أكبر من الشخص لأنه ممكن يتأثر بأي حركة قوية في الفم حتى لو كانت حركة مضغ شديدة شوية.

هتلاقي معلومات أكتر عن التقويم ومقارنة الأسعار في مقال أنواع و أسعار تقويم الأسنان .. وممكن تتمتع باستشارة مجانية عن نوع التقويم المناسب لحالة أسنانك من خلال الـ Whats App