هل التقويم مؤلم؟

التقويم المفروض أنه غير مؤلم بس ممكن يكون مزعج! وممكن نقسم الشعور المزعج دا على مدار الأسبوع الأول من تركيب التقويم:

  • في أول 24 ساعة بعد تركيب التقويم بيحس الشخص بأن في حاجة غريبة في محيط الفم بسبب وجود 12 فص مرتبطة مع بعضها بأسلاك، وكمان بيحس أن تجويف الشفاه من الداخل بيصطدم بالفصوص ودا بينتج عنه الشعور بعدم الارتياح.
  • بعد مرور يوم كامل من تركيب التقويم، بيحس الشخص بوجود ضغط على أسنانه وهو شعور طبيعي لأن الأسنان بتبدأ تتحرك مع بعضها بفعل وجود التقويم.
  • بعد يومين من التقويم بيزيد ضغط التقويم لدرجة الانزعاج الشديد جدًا، وفي حالة الألم المزعج ممكن يلجأ المريض للأدوية المسكنة مثل الباراسيتامول أو الأيبوبروفين حسب إرشادات الدكتور.

ملحوظة: عادًة مع معظم الناس بيكون الألم مزعج لكنه مش شديد لدرجة الاحتياج لأخذ مسكنات؛ والأفضل طبيًا هو عدم اللجوء للمسكنات إلا للضرورة.

تتصرف ازاي أول 24 ساعة بعد التقويم؟

غير مطلوب أي تصرفات معينة غير انك تتفهم أن:

  1. الوجع اللي تقدر تتحمله دا شئ طبيعي بعد تركيب التقويم (في حالة الوجع الشديد لدرجة عدم تحمله، ممكن تلجأ للمسكنات أو تتواصل مع العيادة مباشرًة)
  2. الوجع معناه أن التقويم بدأ بيحرك الأسنان بكفاءة وشئ مش مقلق.
  3. مدة تقويم الأسنان مش قليلة، لكن مدة الوجع بتكون أول يومين وبعد كدا بيتم التعود على وجود التقويم.

أمتى اقدر أكل بعد التقويم؟

ممكن تاكل عادي بعد تركيب التقويم مباشرًة، لكن لازم تتبع تعليمات الدكتور بخصوص الأكل وهي انك تتجنب الأكل الصلب اللي ممكن يتعارض مع التقويم أو يزيد من الضغط بالفم، زي: الجزر، التفاح، قالب شوكولاتة، المكسرات، وهكذا..

معنى كدا انك هتمتنع تمامًا عن المأكولات دي؟ لأ تمامًا انت ممكن تاكل اللي انت عاوزه لكن ابعد عن حالته الصلبة؛ يمعنى أن التفاح ممكن يتم تقطيعه لقطع صغيره بحيث ميسببش ضغط على الأسنان لمّا يتم قطمه، والمكسرات ممكن تتكسر لقطع أصغر، والشوكولاتة ممكن تتاكل لكن مش في حالة القالب الصلب.

ايه أنواع التقويم؟

الوان التقويم كتير لكن أشهر أنواع التقويم بتتلخص في:

  1. التقويم المعدني التقليدي

التقويم المعدني هو أشهر أنواع تقويم الأسنان بيتم استخدامه مع الأشخاص اللي بيعانوا من مشكلة عدم اتساق الأسنان مع بعضها؛ الجسم الأساسي والأسلاك المستخدمة في التقويم المعدني بيكون مصنوع من  معدن غير قابل للصدأ.

من أشهر عيوب التقويم المعدني غير أن شكله غير محبب لكتير من الناس،أنه ممكن يجرح اللثة والبطانة الداخلة للخد وبيزيد من خطورة التصاق الطعام على الأسنان وبالتالي زيادة خطر الإصابة بتسوس الأسنان، لكن من أشهر مميزاته أنه أقل سعر تقويم من بين أنواع التقويم.

  1. تقويم الأسنان الداخلي

في دكاترة أسنان كتير بيفضلوا النوع دا من التقويم مع الأشخاص اللي بيعانوا من صغر حجم الفك مع وجود ازدحام شديد في الأسنان، وهنا التقويم بيدفع الأسنان من الداخل للخارج لحد ما ترجع لشكلها الطبيعي بالفك.

تقويم الأسنان الداخلي بيشبه تقويم الأسنان المعدني التقليدي في تكوينه، لكنه سعره أعلى من سعر تقويم الأسنان التقليدي.

  1. التقويم الشفاف

دا ممكن تعتبره التقويم غير المرئي المصنوع من البلاستيك، وبيتميز أنه مرن أكتر من التقويم المعدني التقليدي، وأن لونه شفاف وبيظهر الأسنان بشكل طبيعي لدرجة عدم ملاحظة أن الشخص مركب تقويم.

لكن لازم تاخد بالك أن التقويم الشفاف غير مناسب مع الأشخاص اللي بيعانوا من أمراض الفم والأسنان زي التهاب اللثة وتسوس الأسنان؛ وعادًة بيبدأ دكتور الأسنان بعلاج كل مشاكل الأسنان بما فيها زراعة الأسنان قبل ما يبدأ بتركيب التقويم.

وعادًة بيكون التقويم الشفاف غير مفضل للأطفال لأن بيتم اقتلاعه أو خلعه بسهولة وبالتالي ممكن الطفل بكل بساطة يقلعه في أي وقت، غالبًا بيتم استخدامه مع البالغين اللي بيعانوا من مشاكل محدودة في عدم اتساق الأسنان مع بعضها.

  1. التقويم السيراميكي

لأن التقويم السيراميكي خفيف في الوزن وله مظهر طبيعي وجذاب وأنيق لدرجة عدم وجود فرق بين لون الأسنان الطبيعي ولون التقويم، بيفضله معظم البالغين.

لكن من حيث تكلفة التقويم، فيعتبر سعر التقويم السيراميكي من أغلى أسعار التقويم نظرًا لمميزاته الكتير.

أما عيوبه ممكن تتجنبها بمداومة المتابعة مع دكتور الأسنان، والتعامل بحرص وقت الأكل والمضغ لأن التقويم السيراميكي ممكن يتكسر مع الأشخاص اللي عندهم قوة المضغ عالية.

  1. التقويم المتحرك

التقويم المتحرك بسيط جدًا في تكوينه لأنه بيتم تركيبه على الأسنان الأمامية فقط، وممكن يتم استخدامه بعد الانتهاء من مدة التقويم التقليدي لضمان أن الأسنان هتفضل في مكانها؛ وممكن يتم استغناء البالغين عن التقويم المتحرك بعد التقويم التقليدي في حالة عدم الرغبة، لكن مع الأطفال فيُفضل تركيب التقويم المتحرك بعد التقويم التقليدي.

  1. التقويم الجراحي

بيتم اللجوء للنوع دا من أنواع التقويم في حالة مشاكل الفم والأسنان اللي أنواع التقويم السابقة غير فعالة بشكل كبير زي وجود بروز شديد في أحد الفكين لدرجة عدم تناسقه مع الفك الآخر، وبالتالي دا هيساعد في استعادة شكل طبيعي للوجه.

بعد التدخل الجراحي لعلاج عدم تناسق الفكين، بيتم تركيب نوع من أنواع التقويم السابقة لتثبيت موضع الفك الجديد وزيادة اتساق الأسنان بالفك.

وبالنهاية، تقدر تعرف معلومات أكتر عن التقويم في مقال أنواع و أسعار تقويم الأسنان .. وتقدر تتمتع باستشارة مجانية لمعرفة نوع التقويم المناسب لأسنانك عن طريق الـ Whats App