أضرار خلع الأسنان (الاسنان الطبيعية لا تقدر بثمن) | د/ معتز الشوبري

بواسطة | فبراير 9, 2020

ايه هي اضرار خلع الأسنان؟

مفيش أي حاجة ممكن تعوض الأسنان أو الضروس الطبيعية، علشان كدا كل دكاترة الأسنان بيحاولوا الحفاظ على السن الطبيعي من خلال الحشو أو تركيب الطربوش وغيره قبل قرار إزالة السن أو الضرس المتضرر نهائيًا.

لكن بيكون في حالات معينة السن أو الضرس متضرر تمامًا لدرجة تمنع من انقاذ السن أو الضرس ولازم يحصل قلع وبعدها زراعة الأسنان او تركيبات الأسنان، لكن الزراعة أو التركيبات رغم كفائتهم العالية لكنهم بيفتقروا لميزة مهمة جدًا وهي وجود الأربطة بين الأسنان الطبيعية وبعضها بشكل يحمي الأسنان من الضغط الكبير اللي ممكن يكسرها في حالة عدم وجود أسنان طبيعية مرصوصة جنب بعضها واستبدالها بالأسنان الصناعية.

ايه الحالات اللي لازم يحصل فيها خلع للأسنان؟

من أكتر الأسباب اللي ممكن تؤدي لخلع الأسنان هي تضرر شديد بالأسنان نتيجة كسور أو تسوس، وبعض الأسباب الأخرى زي:

  1. وجود أسنان زيادة في الفك بشكل يمنع نمو أسنان تانية.
  2. خلع الأسنان المؤقتة لو بتمنع خروج السن الدائم في مكانه بالفك.
  3. أمراض اللثة الشديدة لدرجة أنها تأثر على النسيج والهيكل العظمي اللي بيدعم الأسنان.
  4. بعض الحالات عند تركيب تقويم الأسنان زي مشكلة ازدحام الأسنان في فك صغير.
  5. الإصابة بـ خراج في جذور الأسنان.
  6. أسنان مشوهة نتيجة كسور أو عيب خلقي.
  7. وجود ضرس عقل مدفون.

تعليمات ما بعد خلع الأسنان:

بعد خلع الأسنان لازم المريض يحافظ على شوية تعليمات علشان يمنع استمرار النزيف مكان خلع الأسنان، فمثلًا:

  1. تجنب مضمضة الفم خلال 24 ساعة بعد خلع الأسنان لمنع إزالة شبكة التجلط اللي بتساعد في وقف النزيف (الشبكة مقصود بيها القشرة اللي بتتكون في أي جرح زي جروح اليد وجروح الأسنان)
  2. تجنب التدخين خلال 24 ساعة بعد الخلع علشان تتجنب التهاب التجويف مكان خلع السن.
  3. تجنب التمارين الرياضية العنيفة أو الشاقة.
  4. استخدم بعض أنواع المسكنات لكن تحت إشراف دكتور الأسنان.
  5. ممكن استخدام كمادات تلج أو ماية ساقعة لتقليل تورم الخد مكان الخلع.
  6. لو بدأ مكان الخلع بالنزيف مرة تانية، حاول تضغط بلطف على مكان الخلع باستخدام قطعة من القطن والشاش النضيف، لكن لو استمر النزيف حتى مع الضغط لمدة أطول من 20 دقيقة يبقى لازم تطلب المساعدة من دكتور الأسنان لمعرفة سبب استمرار النزيف.
  7. استخدم غسول فم مناسب حسب تعليمات دكتور الأسنان، ومن الأفضل اجتناب غسول الفم اللي بيحتوي على كحول.

ملحوظة: ممكن تحضر غسول الفم الملحي باستخدام نص معلقة ملح أبيض مع فنجان من الماء الدافئ بعد غليانه، والمضمضة بالمحلول حوالي 3 مرات يوميًا لمنع تراكم البكتيريا بالفم، لكن أكيد لازم يعدي 24 ساعة على الأقل بعد خلع الأسنان علشان تقدر تستخدم محلول الفم.

تتوقع ايه بعد خلع الأسنان؟

المفروض بعد خلع الأسنان أن المريض هيحس بشوية ألم لكن هيروح مع الوقت، لكن كمان ممكن يحس بـ:

  1. الغثيان نتيجة نزول بعض من المخدر الموضعي للمعدة.
  2. تورم الخد قليلًا.
  3. صعوبة في الكلام خاصًة لو كان الخلع حصل للأسنان الأمامية.
  4. تغيير بعض من ملامح الوجه خاصةً لو حصل خلع لأكتر من سن.
  5. الاستمرار على نوع من أنواع المضادات الحيوية لمدة حوالي من 5 لـ 7 أيام.

أسباب ممكن تؤدي لاستمرار نزيف خلع الأسنان:

في الحالات الطبيعية، بيتوقف نزيف الأسنان تلقائيًا خلال الساعات الأولى بعد الخلع، لكن في بعض الحالات القليلة ممكن يبدأ النزيف من تاني بعد 8 لـ 12 ساعة من خلع الأسنان؛ ودا ممكن يحصل بسبب:

عوامل موضع خلع الأسنان زي:

  • تمزق في الأوعية الدموية.
  • حدوث التهابات.
  • حدوث عدوى.
  • نتيجة خلع عنيف للأسنان.
  • عدم التزام المريض بالتعليمات بعد عملية الخلع.

عوامل داخلية زي:

  • مشاكل وراثية تسبب عدم تجلط موضع الجرح.
  • مشاكل في الصفائح الدموية.

إزاي ممكن تعوض فقدان الأسنان؟

أشهر طريقتين لعلاج مشكلة فقدان الأسنان هي زراعة الأسنان وتركيبات الأسنان.

زراعة الأسنان

تعتمد عملية زراعة الأسنان على تثبيت الأسنان المزروعة مباشرة في عظام الفك ومش بتعتمد على الأسنان المجاورة لمكان السن الجديد، علشان كدا زراعة الأسنان غير مناسبة لأي حد بيعاني من هشاشة العظام أو ضعفها وقلة كثافتها.

وتتكون زرعة الأسنان الجديدة من:

  1. الجسم المزروع وهو عبارة عن قطعة من المعدن بتشبه المسمار المصنوع من التيتانيوم، لأن التيتانيوم بيتميز بدرجة عالية من التوافق الحيوي مع أنسجة الجسم وبالتالي قليل جدًا لما يحصل حساسية بسببه.
  2. الدعامة وهي جزء صغير عبارة عن وصلة بتربط الجسم المزروع بالطربوش أو التاج النهائي.
  3. جسر أو تاج الأسنان واللي بيشبهوا في شكلهم السن الطبيعي، وبيكونوا مصنوعين من الزيركون أو البورسلين أو السيراميك.

لو حابب تعرف أكتر عن زراعة الأسنان وأسعارها، هتلاقي مقارنة بين الأسعار في مقال أسعار زراعة الأسنان.

تركيبات الأسنان

تركيبات الأسنان هي الحل المقابل الأقل في السعر لزراعة الأسنان، وبتتم عن طريق استخدام طربوش أو تاج في حالة فقدان سن واحد، أو جسور الأسنان في حالة فقدان أكتر من سن في أماكن متقاربة بالفك.

وتكوين تركيبات الأسنان بتتشابه مع تكوين زراعة الأسنان، لكن بيكون في أنواع من تركيبات الأسنان إما ثابتة زي زراعة الأسنان، أو تركيبات الأسنان المتحركة اللي ممكن يتم تلبيسها وخلعها حسب الرغبة، على عكس زراعة الأسنان فهي ثابتة دايمًا بمجرد غرسها.

لو حابب تعرف أكتر عن تركيبات الأسنان وأسعارها، هتلاقي مقارنة بين الأسعار بين انواعها المختلفة في مقال أسعار تركيبات الأسنان في مصر.