ايه الفرق بين تركيبات الأسنان و زراعة الأسنان؟

قبل لما نبدأ مقارنة بين زراعة الأسنان و تركيبات الأسنان، لازم نفهم معنى وطريقة كل نوع لوحده.

زراعة الأسنان

هي تعويض الأسنان اللي تم فقدها سواء عن طريق الخلع أو بسبب حادثة واصطدام شديد أو غيرها من الأسباب.

زراعة الأسنان بتتم على خطوات ومراحل زي:

  1. بيبدأ دكتور الأسنان بحقن الفك بمخدر موضعي، وبعد حوالي 20 دقيقة أو أقل على حسب نوع المخدر واستجابة المريض، بيقوم الدكتور بزرع جسم يشبه المسمار مصنوع من التيتانيوم في عظام الفك مباشرةً علشان ـادي وظيفتها في تثبيت بقية أجزاء الزرعة عليها، يعني نقدر نقول على الجزء دا أنه شبه جذر الأسنان.
  2. بعد غرس مسمار التيتانيوم في الفك، بيركب الدكتور عليه طربوش أو تاج مؤقت ويطلب من المريض الانتظار لحد ما يحصل الاندماج العظمي، وبتكون متوسط المدة حوالي حوالي 3 شهور للفك السفلي أو 6 شهور للفك العلوي.

    والمقصود هنا بالاندماج العظمي هو اندماج جسم الزرعة الجديد -التيتانيوم- مع عظام الفك، وكل ما نسبة الاندماج العظمي تزيد كل ما تزيد درجة ثبات الزرعة لمدة أطول.

  3. خلال مدة الاندماج العظمي بيخضع المريض لعدد من الجلسات في عيادة دكتور الأسنان علشان يتم أخذ قوالب الأسنان مقاساتها من حيث الطول والعرض والشكل والحجم، وبعد كدا بيبعت الدكتور المقاسات دي للمعمل ويتم تحضير سن جديد للزراعة متوافق ومتناسق مع شكل باقي الأسنان الأصلية.
  4.  أخر مرحلة بعد تمام الاندماج العظمي، بيقوم فيها الدكتور بخلع الطربوش أو التاج المؤقت وتركيب دعامة وطربوش دائم؛ والهدف هنا من الدعامة هو ربط واتصال جسم التيتانيوم الملامس للفك من جسم السن أو الضرس الجديد.

تركيبات الاسنان

تعويض للسنة المفقودة عن طريق برد جزء من الاسنان المجاورة لمكان السنة المفقودة والتركيب عليها، يعني السن الجديد اللي هيتم تركيبه لازم يكون مسنود على الأسنان اللي جنبه من الطرفين واللي لازم يكونوا بصحة جيدة تتحمل مجاورة السن الجديد.

امتى ينفع تختار زراعة الاسنان؟

  • لو مش مدخن شره وتقدر تقلع عن التدخين لفترة، لأن التدخين بيأثر على نظافة زرعة الأسنان، بالتالي البكتيريا مع التدخين ممكن يتسببوا في عفن الزرعة وفشلها.
  • لو عندك السكر لكن في متابعة مستمرة وسيطرة كاملة لمستوى السكر،لأن مستوى السكر بيفرق جدًا في وقت التئام الجراحة.
  • لو مفيش أي مرض بيستدعي العلاج الإشعاعي لمنطقة الرقبة والرأس.
  • لو مش بتعاني من أمراض الدم زي سيولة الدم أو اضطراب النزيف.
  • لو مفيش أي تاريخ مرضي عن التهابات اللثة والحساسية تجاه بعض المعادن خاصةً معدن التيتانيوم؛ وبالمناسبة، مفيش ناس كتير ممكن يصابوا بحساسية من التيتانيوم لأنه بيتميز بدرجة عالية من التوافق مع أنسجة الجسم الحية.
  • لو مش بتعاني من أي مشكلة أو مرض من أمراض العظام اللي بتمنع التئام وتشافي العظام بسرعة زي هشاشة العظام.

امتى ينفع تختار تركيبات الاسنان؟

في بعض الشروط اللازم توافرها قبل ما تفكر في حل تركيبات الأسنان للأسنان المفقودة، زي:

  • انك تكون مداوم على العادات الصحية للفم والأسنان، زي الاهتمام بغسل الأسنان باستمرار بفرشاة ناعمة مناسبة لحالة أسنانك.
  • ان ميكنش في أي تاريخ مرضي للإصابة بالتهابات اللثة.
  • عظام الفك لازم تكون في حالة سليمة، وتكون كافية لعملية تركيب الاسنان.
  • مفيش أي أمراض مزمنة زي أمراض القلب ومرض الضغط.

ايه هي مميزات زراعة الأسنان:

  • وجود أسنان دائمة مش بتتخلع مع الضحك أو وقت حركة الفم في الأكل، ولا تعرضك لمواقف محرجة.
  • ميزة الاندماج العظمي مع عظام الفك بتخليها ثابتة وقوية أكتر، على عكس تركيبات الاسنان اللي غالبًا بتكون جسر متركب في سنتين حول السنة المفقودة.
  • الشكل واللون قريب جدًا من لون الأسنان الطبيعي، وده بيأثر بشكل إيجابي على مظهرك الخارجي وشكل ابتسامتك.
  • بتعدل النطق: يعني لو في حروف بتتنطق غلط بسبب فقدان الأسنان، بعد الزراعة المشكلة دي هتتحل.
  • بتعالج مشكلة مضغ الطعام بصعوبة واللي بيترتب عليها ساعات عسر هضم، لأن مع فقد أحد الأسنان عملية مضغ الطعام بتكون بكفاءة أقل.

مميزات تركيبات الاسنان الثابتة:

  • تحسين شكل الابتسامة وبالتالي الملامح بتظهر بشكل أفضل.
  • بتحافظ على الأسنان الطبيعية الموجودة في الفم، بحيث يمنعها من أي حركة سلبية.
  • تحسين طريقة الشخص في مضغ الطعام، لأن المكان الفاضي نتيجة السن المفقود بيسبب مشاكل في المضغ.

عيوب زراعة الاسنان (لو اختارت عيادة أسنان عادية)

زراعة الأسنان معرضة لنسبة فشل كبيرة في حالة:

  • لو ملتزمتش باللي دكتور زراعة الاسنان قاله عن التحميل على السن المزروعة.
  • لو دكتور زراعة الاسنان متأكدش من قوة وجودة عظام الفك ممكن تحصل مشاكل بعد العملية زي كسر الزرعة.
  • لو التعقيم عن دكتور زراعة الاسنان مش أحسن حاجة ممكن الشخص يتصاب بحالة عدوى غير متوقعة، ويحصل تعفن تحت السنة المزروعة.
  • لو دكتور زراعة الاسنان مش مؤهل للجراحة ممكن يعمل مشاكل في المنطقة اللي حول السنة زي الأعصاب والأوعية الدموية.

عيوب تركيبات الأسنان الثابتة:

  • الدكتور بيضطر لإزالة العصب الطبيعي للسن المفقود.
  • ممكن تسبب حساسية للأسنان اللي متركب عليها الجسر: لأن دكتور الأسنان بيضطر أنه يبرد من 1 لـ 2 ملم من طبقة المينا اللي في الأسنان المجاورة علشان يقدر يعمل تركيبات الأسنان.
  • لو غلطت في اختيار دكتور تركيبات الاسنان ممكن يختار لون مختلف عن لون الأسنان الطبيعية وبالتالي المظهر الخارجي هيتأثر بالسلب بدل ما المفروض يتحسن.
  • اتأكد انك غلطت في اختيار دكتور تركيبات الأسنان إذا حسيت بألم في مفصل الفك، لأن ده بيكون دليل على أن تركيبات الأسنان مرتفعة عن مستوى الأسنان الطبيعية.

تقدر تعرف معلومات أكتر وتقارن بين اسعار الخدمتين في مقال أسعار زراعة الأسنان و مقال أسعار تركيبات الأسنان في مصر