ينفع أعمل تقويم وأنا عامل تركيبات في أسناني؟ | د/ مصطفى الشيتي

بواسطة | فبراير 9, 2020

ينفع أعمل تقويم الأسنان وانا عامل تركيبات في أسناني؟

الإجابة هي أة لكن أة مشروطة، يعني ينفع حد يعمل تقويم الأسنان وهو مركب في أسنانه طربوش أو كراون لكن بشروط زي:

  1. لازم تبقى عارف أن فصوص التقويم بتكون مسؤولة عن تحريك كل سن من الأسنان “بشكل منفصل” في 3 أبعاد (لليمين أو للشمال، لفوق أو لتحت، بزوايا معينة في الفك)، ودا معناه أن لو حد عامل تركيبات أسنان منفصلة ممكن بسهولة يتم تركيب تقويم الأسنان على الطربوش من غير أي مشاكل بنوع معين من الصمغ مهما كان نوع تركيب الأسنان زي الزيركون أو البورسلين.
  2. لو الشخص عامل تركيبات متصلة أو المعروفة بالجسور، ممكن يتم تركيب التقويم عليها لكن مش هيتم الاستفادة منها بشكل كامل لأن الأسنان تعتبر ملزوقة في بعض لدرجة متسمحش بتحريك كل سن لوحده في الـ 3 أبعاد؛ – ولكن ايه الحل في الحالة دي؟ الحل هو الرجوع لدكتور الأسنان المتخصص في التركيبات لفصل التركيبات المتصلة دي بحيث يقدر دكتور تقويم الأسنان بالتحكم في الأسنان بشكل كامل.

ايه الفرق بين تركيبات الأسنان المنفصلة والمتصلة؟

تركيبات الأسنان المنفصلة أو المتصلة من نوع التركيبات الثابتة، وبيتم اللجوء لكل نوع على حسب حالة الأسنان، فمثلاً:

التاج – الكراون المنفصل

  • بيتم استخدامه مع الضرس أو السن المسوس.
  • مناسب للضرس اللي تم حشوه ومحتاجين نحمي الحشوة من السقوط من مكانها
  • بيتم تركيبه على سن أو ضرس واحد فقط بشكل منفصل.
  • أنواع تاج الأسنان بيختلف على حسب المادة المصنوع منها زي البورسلين والزيركون والسيراميك وإيماكس e-max.

جسور الأسنان المتصلة

  • جسور الأسنان فكرتها بتتلخص في دمج أكتر من تاج مع بعض ليتم تركيبهم مرة واحدة على الأسنان المتضررة المتجاورة.
  • بيتم ربط الجسر مع الأسنان السليمة المتجاورة كدعامة للجسر.
  • بيتم تثبيت الجسر على الأسنان الجانبية فقط باستخدام أنواع معينة من الصمغ، معنى كدا أن لو في 3 أسنان متجاورة هيتم وضع الصمغ على السن 1 و 3 فقط.
  • أنواع جسور الأسنان هي نفسها أنواع تاج أو طربوش الأسنان، وكل نوع بيختلف عن التاني في درجة صلابته ولمعانه وبريقه.

ايه أفضل نوع من أنواع التقويم في حالة وجود تركيبات الأسنان؟

في بعض دكاترة الأسنان بيفضلوا عدم تركيب تقويم ثابت في حالة وجود تركيبات الأسنان، وبيميلوا لـ استخدام تقويم الأسنان المتحرك الشفاف إذا أمكن رغم أنه مش بنفس كفاءة تقويم الأسنان الثابت وبالأخص المعدني التقليدي.

وعلى الجانب الآخر، في بعض الدكاترة بيفضلوا تركيب التقويم الثابت المعدني التقليدي بسبب كفاءته العالية لكن بعد فصل جسور التركيبات لتركيبات منفصلة.

في النهاية، بيحدد دكتور الأسنان نوع التقويم المناسب على حسب حالة أسنانك والتكلفة المادية.

التقويم الثابت

أنواع التقويم الثابت كتير ومن أشهرها التقويم المعدني التقليدي، وجميع أنواع التقويم الثابت بيتميزوا بـ:

  1. الحصول على نتائج نهائية أفضل، لأن التقويم الثابت بيمكن دكتور الأسنان من التحكم في حركة الأسنان لليمين أو للشمال أو فوق أو تحت بقوة كافية تسمح بإعادة الأسنان لمكانها وشكلها الطبيعي.
  2. جميع الأسنان بعد التقويم الثابت بيكون لها طول متساوي.
  3. تناسق كبير في شكل قوس الفك والأسنان.
  4. تحكم كامل في شكل كل سن أو ضرس لوحده على مستوى ثلاثي الأبعاد.

لكن من عيوب التقويم الثابت أن سهل يحصل التصاق لأنواع كتير من الأطعمة على فصوصه، وبكدا بتزيد نسبة خطورة الإصابة بتسوس الأسنان وضعفها؛ بالإضافة أن ممكن يسبب خدوش في الغشاء المبطن للخد من الداخل.

التقويم المتحرك

كتير من الناس بيفضلوا التقويم المتحرك عن التقويم الثابت بسبب سهولة تركيبه وإزالته في أي وقت، بحيث أن الشخص هو المتحكم في وضع التقويم، على عكس التقويم الثابت اللي بيحتاج زيارة لدكتور الأسنان لفكه وتركيبه.

ومن أشهر أمثلة التقويم المتحرك هو التقويم الشفاف اللي غالبًا بيكون مصنوع من البلاستيك وبينتج عنه مظهر طبيعي جدًا للأسنان وبيكون صعب أن حد يلاحظ أن الشخص مركب تقويم بسبب درجة شفافيته العالية.

لكن من أشهر عيوبه أنه مصمم للتحكم الجزئي في حركة الأسنان، يعني دكتور الأسنان مش هيقدر يتحكم في حركة كل سن لوحده بشكل ثلاثي الأبعاد.

هل هتضرر تركيبات الأسنان أو عدسات الأسنان بسبب التقويم؟

تركيبات الأسنان زي تركيبات الزيركون أو تركيبات البورسلين، أو عدسات الأسنان زي الفينير أو اللومينير، مش هيتأثروا بوجود التقويم طول ما التركيبة نفسها أو الحشو سليم وصحي.

ووقت إزالة التقويم بعد الوصول لأفضل نتائج بيقوم دكتور الأسنان بإزالته بطريقة معينة تتجنب حدوث أي ضرر للتركيبات أو العدسات.

هل هحتاج تركيبات أو عدسات أسنان إضافية بعد إزالة التقويم؟

حالات قليلة ممكن تحتاج تغيير تركيبات الأسنان أو عدسات الأسنان بعد إزالة التقويم علشان تتناسب مع وضع وشكل الأسنان الجديدة.