تعمل إيه مع حساسية الاسنان!.. دليل شامل وأهم نصائح المتخصصين

بواسطة | سبتمبر 7, 2021

حساسية الأسنان مشكلة شائعة جداً عند معظم الناس في العالم كله مش بس الوطن العربي، لدرجة إن فيه ناس بتفتكر إنها أمر طبيعي بيحصل مع الكل نتيجة لأكل حاجة باردة مثلاً، لكن في الحقيقة حساسية الأسنان هي واحدة من مشاكل الأسنان اللي لازم تتعالج، وعلاجها بسيط جداً لأنها في الأصل ناتجة عن عادات غير صحية، ومع تكرار العادات دي بشكل يومي بتتسبب في حصولها.

يعني إيه بالظبط حساسية الأسنان ؟

ببساطة حساسية الأسنان هي حالة طبية خاصة بصحة الأسنان واللثة مع بعض، بتحصل لما المادة اللي بتحمي الأسنان تختفي أو تتضرر.
والأسنان الحساسة هي الأسنان اللي بتحس بالألم نتيجة أكل أو شرب سخن أو بارد. و حتى ممكن تتألم نتيجة مرور هواء عليها سواء وقت الكلام أو أثناء فتح الفم.

والمشكلة دي بتبقى مزعجة جداً لأن صاحبها ممكن يتعرض للألم ده فجأة في أي وقت وأي مكان حتى أثناء الكلام.

هل فيه مراحل لألم حساسية الأسنان وهل الألم ثابت عند كل الناس؟

هي بالفعل بتتطور لو المشكلة متعالجتش بشكل صحيح، لكن من البداية حدة ألم الأسنان مسألة فردية، يعني لو فيه اتنين مصابين بحساسية الأسنان كل واحد منهم ممكن يحس بدرجة ألم مختلفة.

أعرف منين إن عندي حساسية الأسنان (الأعراض)

ببساطة زي ما قولنا لو حسيت بألم بعد أكل أو شرب مواد سخنة أو باردة ، أو حسيت بألم بعد مرور الهواء على أسنانك يبقى انت بتعاني من حساسية الأسنان.
ودي أعراض حساسية الأسنان للكبار، أما الأطفال لو حسوا بنفس الألم فده غالباً بيكون نتيجة لتسوس الأسنان مش الحساسية. لأن حساسية الأسنان بنسبة كبيرة بتصيب البالغين، بخلاف الأطفال.
لو عندك أي استفسار بخصوص ألم الأسنان, تقدر تستشير دكتور متخصص من عيادتنا وايت أند برايت| للاستشارة المجانية أونلاين

 ليه أسناني حساسة؟ (الأسباب)

تسوس الأسنان أحد الأسباب المهمة لحساسية الأسنان لأنه بيتسبب في كشف جذور السنة وبالتالي سهولة تعرضها لعوامل حرارة وهواء وغيرها بالشكل اللي يسبب حساسية الأسنان. وفيه أسباب تانيه لحساسية الأسنان بتنتج عن بعض العلاجات التجميلية أو الطبية للأسنان زي حشو الأسنان، تبييض وتنظيف الأسنان و تركيبات الأسنان وغيرها. لأن في معظم العلاجات دي ممكن مينا الأسنان تتضر ولو بنسبة بسيطة.

وبما أن تآكل مينا الأسنان هي السبب الرئيسي لحصول حساسية الأسنان. لما بتتآكل المينا دي بيحصل تراجع للثة وده بيسبب كشف عن عنق السِنّة (أقرب جزء من السِنّة لللثة وقريب من الجذر).

بما إن تآكل المينا هي السبب الرئيسي لحساسية الأسنان طيب إيه أسباب تآكل المينا؟

أسباب تآكل مينا الأسنان

1- استخدام علاج غير ملائم زي :

1.1– مبيضات الأسنان

وده لأنها في الغالبة بتكون مكونة من مواد مؤكسدة بتسبب تآكل المينا، عشان كده من الأفضل استشارة الدكتور المتخصص قبل استخدام أي مبيضات للأسنان.
ملحوظة : في الحالات المبكرة من حساسية الأسنان أحياناً بيكون التوقف عن استخدام المبيضات والعلاج الغير مناسب لأسنانك هو حل كافي لعلاج حساسية الأسنان، وده مع استخدام معجون أسنان فيه نيترات البوتاسيوم.

 1.2- فرشاة الأسنان 

في حالة اختيار فرشاة أسنان خشنة وصلبة ومع الغسل بقوة بيأدي لحك الأسنان بشكل مبالغ فيه لدرجة إنها بتسبب حساسية الأسنان.

2- الأطعمة الحمضية

الإفراط في أكل الطعام اللي فيه نسبة حموضة عالية زي الليمون والجريب فروت بيأدي لتآكل طبقة مينا الأسنان.

3- تشقق الأسنان

لو بتاكل مكسرات صلبة كتير أو حلويات أو تلج بتحتاج تضغط بأسنانك عشان تتكسر وده بيأدي لتشقق أو كسور في الأسنان.

4- عادة الضغط على الأسنان

الضغط النفسي وغيره ممكن يخليك بدون وعي تضغط كتير على أسنانك ومع الوقت ده بيسبب تآكل طبقة المينا اللي بينتج عنها زيادة حساسية الأسنان.

ازاي أعالج حساسية الأسنان

زي ما قولنا في البداية حساسية الأسنان بنسبة كبيرة هي نتيجة عادات غير صحية بتتعمل بشكل يومي لو صلحنا العادات دي نبقى عالجنا مشكلة حساسية الأسنان من الأصل. والعادات الصحية دي زي:

اختيار معجون أسنان مناسب

ودي من أهم خطوات علاج حساسية الأسنان (اختار معجون أسنان فيه مادة الفلورايد).

استشارة الدكتور قبل استخدام مبيضات الأسنان

وده لخطورة الإفراط في استخدامها، لأنه زي ما قولنا بتضر مينا الأسنان بشكل مباشر.

استخدام غسول الأسنان بشكل بسيط ومناسب

من الأفضل استشارة الدكتور في اختيار نوع الغسول المناسب لحساسية الأسنان.

الابتعاد عن المشروبات والأطعمة الحمضية بقدر الإمكان

زي الطماطم والليمون والمشروبات الغازية

غسل الأسنان بفرشاة مناسبة

اختيار فرشاة ناعمة والغسل برفق من أهم العادات الصحية للحفاظ على اللثة والحماية من حساسية الأسنان.

زيارة الدكتور بشكل دوري

إنك تطمن باستمرار على صحة اسنانك ده مش حاجة بأهمية قليلة وده لأن مشاكل كتير من مشاكل الأسنان علاجها بيختلف حسب حالتك، فالدكتور بيبقى قادر يحدد المشكلة وأنسب طريقة لعلاجها.

اعمل إيه عشان مترجعليش تاني (الوقاية)

حافظ على العناية بأسنانك بشكل دوري ومتستناش الأصابة بأي مشكلة من مشاكل الأسنان وده عن طريق
– غسل الأسنان بالفرشاة والمعجون المناسب.
– تنظيف الأسنان بالخيط.
– تناول الخضروات والابتعاد عن الأطعمة الحمضية.
– التوقف عن التدخين.
– التوقف عن شرب المواد الغازية.
– الحذر والحرص عند أكل المكسرات الصلبة.
– التقليل من السكر والحلويات.
-المتابعة مع دكتور أسنان كل فترة.

الأسئلة الشائعة حول حساسية الأسنان

هل حشو الأسنان بيسبب حساسية للأسنان؟

التسوس في الأصل سبب كبير من أسباب حساسية الأسنان، كمان علاج التسوس بالحشو ممكن يسبب حساسية للأسنان لكن بشكل مؤقت في بداية المدة بعد حشو السِنّة، ولو الحساسية استمرت فترة من الأفضل استشارة الدكتور لحل المشكلة في أسرع وقت.

ازاي اعالج حساسية الأسنان بعد التبييض؟

1- استخدم معجون أسنان بيحتوي على بيروكسيد بكمية أو نسبة أقل، وده حتى لو هيقلل النتيجة الجمالية في اللون لكنه هيحافظ على صحة أسنانك.
2-قلل من المشروبات الباردة جداً أو السخنة جداً خصوصاً بعد التبييض مباشرة.
3-أهم خطوة هي اتباع كل نصايح وتعليمات الدكتور المتخصص.

ازاي اعالج حساسية الأسنان بعد الحشو؟

تقدر تقلل أو تخفف ألم حساسية الأسنان بعد الحشو عن طريق بعض الخطوات:
1- قلل المشروبات أو الأطعمة الباردة جداً أو السخنة جداً بعد فترة الحشو مباشرة ( لمدة مؤقتة هيحددهالك بدقة الدكتور المتخصص حسب حالة أسنانك)
2- ابعد عن السكريات في الأكل أو الشرب.
3- ابعد عن المشروبات والأطعمة الحمضية.
4-اغسل أسنانك بلطف باستخدام فرشاة ناعمة ومعجون أسنان مناسب لحساسية الأسنان.
5- اتبع كل تعليمات الدكتور المتخصص.

لو عندك أي اسئلة ومحتاج استشارة الدكتور تقدر دلوقتي تحجز استشارة مجانية مع دكتور متخصص من عيادة White & Bright Dental Center