fbpx

هل‌ ‌الشاي‌ ‌مضر‌ ‌ولا‌ ‌مفيد‌ ‌لأسنانك؟‌

بواسطة | سبتمبر 11, 2021

الشاي من المشروبات الروتينية عند ناس كتيرة جداً، في مصر مثلاً شرب الشاي مرتبط ببداية الشغل و المذاكرة والسهر وغيرها من الأفعال اللي بينهم رابط الاحتياج للتركيز، وفي الحقيقة شرب الشاي بكميات كبيرة وبشكل روتيني مش عادة مصرية أو موجودة في الوطن العربي بس.بدليل إن فيه دراسة اتعملت على الشعب البريطاني بتقول إن البريطانيين بيشربوا حوالي 50 مليار كوباية شاي كل سنة!
في المقال ده هنجاوب على أكتر من سؤال شاغلين بالك لو انت من مُحبي شُرب الشاي وفي نفس الوقت خايف على صحتك وصحة أسنانك.
الأسئلة دي بشكل أساسي هي:

هل فيه أنواع شاي مفيدة وأنواع شاي مضرة؟

هل شرب الشاي مؤثر على الجسم بشكل إيجابي فعلاً وبيخلي الشخص يركز؟

هل شرب الشاي ده عادة غير صحية بتضر الجسم ؟

الشاي الأسود

نبدأ بسؤال “هل فيه أنواع شاي مفيدة وأنواع شاي مضرة” ؟ غالباً الشخص اللي بيسأل السؤال ده متوقع إني هقول الشاي الاخضر هو النوع المفيد والشاي الأسود مضر. لكن المفاجأة إن الشاي الأسود ليه فوايد كتيرة جداً لما بيكون بشكل صحي (باعتدال) يعني بدون شراهة في الشرب وده اللي بينصح بيه الدكاترة عندنا في عيادة وايت اند برايت White & Bright Dental Center

أكتر من 7 فوايد للشاي الأسود

شرب الشاي الأسود ليه فوايد لصحة الجسم عموماً وتحديداً صحة اللثة والأسنان وصحة الفم. في البداية لازم أأكد عليك إنك عشان تستفيد بكل فوايد الشاي لازم تبقى بتشربه بطريقة صحيحة زي إنك تشربه باعتدال في عدد المرات والكميات وزي إنك تشربه من غير لبن أو سكر.

1- شرب الشاي الأسود بيعزز من صحة الفم وده لأن الشاي فيه مواد مضادة للجراثيم بتقدر تقلل من انتشار البكتيريا في منطقة الفم.

2- بيقلل من مستوى السكر في الدم وده حاجة تأكد عليك إنك تشربه من غير سكر.

3- ليه خصائص بتقلل الالتهاب و تمنع نمو البكتيريا في الفم وده بيعالج بشكل جزئي بعض الأمراض اللي منها نزيف و التهاب اللثة.

4- الشاي الأسود فيه أحماض أمينية بتقدر بتساعدك تركز بشكل أكبر، وبيساعد على الهدوء والراحة والاسترخاء.

5- شرب الشاي بطريقة صحية بيعزز من المناعة، وده لأن الشاي الاسود ليه قوة دفاع أفضل في مكافحة الفيروسات الشائعة دلوقتي.

6- بالنسبة للأسنان فهو بيحتوى على الفلورايد اللي قادر يحارب البكتيريا المرتبطة بتسوس الأسنان وأمراض اللثة بشكل جزئي.

7- بيمنع ترسبات الجير وده لأن الشاي بيحتوي على مواد زي الفلافونيد و البوليفينول، ودول مادتين بيمنعوا تحول النشا لجلوكوز، و بالطريقة دي بيقدر يمنع انتشار وتكاثر البكتريا اللي بتسبب لطبقات “البلاك” (ترسيبات الجير) على الأسنان، لأن البكتريا دي بتتغذي بشكل أساسي على الجلوكوز. وبما إن البكتيريا دي بتسبب روائح سيئة للفم فبالتالي شرب الشاي بيعالج المشكلة دي.

فوايد تانيه للشاي

شرب الشاي باعتدال ليه فوايد تانية كتيرة زي إن فيه خصائص مضادات الأكسدة، مفيد لصحة القلب و بيقلل ضغط الدم.

بعد كل المميزات اللي شوفتها خليني اوضحلك ازاي وقد إيه شرب الشاي الاسود بطريقة غير معتدلة وصحية بيضر بصحة وشكل أسنانك.

بعض أضرار الشاي الأسود

1- التسوس وتجاويف الأسنان
بالرغم من إن الشاي مش بيسبب التسوس لكن المواد المضافة ليه هي السبب الرئيسي لتسوس الأسنان. والمواد المضافة زي زي السكر مثلاً والعسل.
2- التصبغات
بيحتوي الشاي على مادة التانين ، ودي عبارة عن مادة صفراء أو بنية موجودة في النباتات اللي بتدي الشاي لونه. فبالتالي بيتسبب شرب الشاي الاسود لتلطيخ وتغيير لون أسنانك.

نصائح تقلل ضرر شرب الشاي الاسود

لو انت من مٌحبي الشاي وفي نفس الوقت خايف على شكل أسنانك هقوللك على بعض النصايح اللي ممكن تساعدك تقلل من أضراره.

بعض أضرار الشاي الأسود

1- أفضل نصيحة هي اللي بدأت بيها كلامي من الأول وهي الاعتدال في شرب الشاي
2- من الأفضل ليك تحول من الشاي الأسود للشاي الأخضر من وقت للتاني.
3- كل ما يبقى مناسب اغسل فمك بالماء بعد شرب الشاي الاسود.
4- أكل اللبنان (علكة) الخالي من السكر بيساعد في عدم التصاق التصبغات دي بالأسنان
5- تنظيف اللأسنان بالفرشاة ممكن بردو يساعدك تتخلص من التصاق الشاي الاسود بالأسنان.
6- تبييض الأسنان
الحل ده دلوقتي بقي سهل جداً وتكلفته بسيطة وبيساعدك تحصل على ابتسامة بيضاء أكتر وطبيعية بشكل مثالي.

الشاي الأخضر

الشاي الأخضر شهرته من ناحية الفوايد أكبر بكتير من شهرة الشاي الاسود اللي يمكن عرض كل الفوايد بتاعته فوق هيبقى لبعض الناس مفاجأة حلوة. شهرة وتأثير الشاي الأخضر دول بسبب إنه بيحتوي على مركبات و مكونات غنية جداً ومفيدة لجسم الإنسان وصحته زي:
( فيتامينات C وB وE، حمض الفوليك- بيتا كاروتين Beta carotene، مادة الصابونين Saponins، الحمض الأميني GABA، المعادن مثل البوتاسيوم والكالسيوم والمنغنيز والمغنيسيوم، صبغة الكلوروفيل الخضراء Chlorophyll، مادة Catechins المضادة للأكسدة، الفلور Fluorine والكافيين )

6 فوايد للشاي الأخضر (بالنسبة لصحة الجسم )

1- بيعالج الصداع

2-بيخفف من الاكتئاب

3- بيساهم في خسارة الوزن

4- بيخفض مستوى الكوليسترول

5-بيساعد على حماية القلب والشرايين

6- يقي من الإصابة بالسرطانات والزهايمر

كل دي وأكتر فوايد للشاي الأخضر لكن ده بالنسبة لجسم وصحة الأسنان عموماً ويمكن أغلبها كان معروف بالنسبالك، لكن هل الشاي الأخضر ليه تأثير إيجابي أو سلبي تحديداً على الأسنان؟

فوايد الشاي الأخضر للأسنان

1-من أهم مميزات شرب الشاي الأخضر بالنسبة للأسنان إنه بيحارب التسوس وده بسبب مكوناته.
2-ومن فوايده المهمة تعزيز صحة اللثة، وده لإنه مضاد للالتهابات زي التهاب اللثة (فيه دراسة بتقول إن استخدام الشاي الاخضر ممكن يستخدم كغسول وده هيقلل خطر الإصابة بأمراض اللثة)

3- تقليل فقدان الأسنان لأنه بيقلل البكتيريا في الفم وبيقلل تسوس الأسنان فأكيد هيساهم بشكل كبير في التقليل من فقدان الأسنان.
4- الوقاية من سرطان الفم، لاحتوائه على مضادات الأكسدة فبيقدر يساهم في الوقاية من تلف الخلايا ونمو الورم السرطاني.
بالرغم من فوايده الكتيرة جداً سواء لصحة الجسم أو لصحة الفم فمن المؤكد زي معظم الحاجات المفيدة لو اتعاملت معاه بشكل غير صحي وأفرطت في استخدامه فهيبقى ليه آثار جانبية وأضرار كبيرة.

7 أضرار الشاي الأخضر

شرب كميات كبيرة جداً من الشاي الأخضر بيضر الجسم بأكتر من حاجة زي:
1- الصداع
2- العصبية
3-حصول مشاكل في النوم،
4- الإسهال
5-عدم انتظام دقات القلب نتيجة لمحتواه العالي من الكافيين.
6- مشاكل في الكبد
7- ارتفاع ضغط الدم

نصايح تقلل ضرر شرب الشاي الأخضر

– لو بتعاني من مشاكل في الدم زي فقر الدم من الأفضل سؤال الطبيب المتخصص والمسئول عن متابعة حالتك عن إمكانية شرب الشاي الأخضر ولا لأ
2- زي الشاي الأسود من ناحية الاعتدال في الشرب.

في النهاية
العناية بصحة أسنانك سواء بنظافتها أو بنظام غذائي صحي ضرورة هتلمس أهميتها كل يوم عن التاني. بالإضافة لأن الفحص الدوري المستمر مع دكتور أسنان متخصص هيساعدك تكتشف المشكلة حتى لو أعراضها لسه مظهرتش وده هيساعدك تحلها أسرع وبأقل تكلفة وضرر.