انا حامل في الشهر الخامس، هل التقويم هيأثر على الحمل؟ | د/ مصطفى الشيتي
هل التقويم يؤثر على الحمل ؟
في أسئلة كتير بتيجي زي ” عادي اركب تقويم وانا حامل ؟” و “هل شد التقويم يضر الحامل ؟”
الإجابة: لأ، لأن التقويم نفسه عبارة عن إجراء طبي وتعديل ميكانيكي لشكل الأسنان، وفي تكوينه كـ جسم معدني أو أسلاك وفصوص، لا يتعارض مع الحمل تمامًا بـ أي شكل من الأشكال لا بالسلب ولا بالإيجاب ولا أي تأثير على الحامل أو الجنين.
لكن التقويم للحامل بيتطلب منها أنها تحافظ أكتر على العناية بـ صحة الفم بشكل يومي، لأن بسبب التغييرات الهرمونية في فترة الحمل بتكون اللثة ضعيفة وحساسة وسهل يحصلها التهاب و أمراض ( لو عايزه تعرفي ايه هي أمراض اللثة وطرق الاعتناء بيها) ؛ حتى من غير تركيب تقويم لازم الاهتمام بصحة الفم للحامل بشكل أكبر شوية عن غير الحامل.
وكمان الحامل لازم تاخد بالها إن معظم المسكنات بتكون ممنوعة أثناء الحمل إلا أنواع قليلة مسموح بيها تحت إشراف دكتور النسا على حسب حالة الأم والجنين، وبالتالي الحامل هتضطر تتحمل ألم التقويم بدون مسكنات -وعادة ألم التقويم ممكن يكون صعب أول 24 ساعه بعد التقويم وبعدها مش بيكون شديد، وكتير من الناس بيقدروا يتحملوه من غير مسكنات، لكن عند تركيب التقويم للحامل الأمر بيتطلب رعاية أكبر.
ليه في اعتقاد أن التقويم مضر بالحمل؟
زي ما قولنا أن تقويم الاسنان للحامل غير مضر بالحمل، لكن الأشعة والفحوصات الطبية اللي لازم بيتم إجرائها خلال مدة التقويم هي اللي ممكن تكون مضرة بالحمل، وبتختلف نسبة خطورة الأشعة دي على الحمل على حسب عدد شهور الحمل، يعني نسبة الخطورة في أول 3 شهور و أخر 3 شهور من الحمل عالية شوية ومن الأفضل عدم إجراء الأشعة في الأشهر دي لأن الأشهر دي من أهم شهور تكوين الجنين.
ومع أن الأشعة كلها بتكون ديجيتال ونسبة الإشعاع فيها قليل جدًا، لكن كتير من دكاترة الأسنان بيفضلوا الابتعاد عن أي شئ ممكن يسبب خطورة على الحامل أو الجنين حتى لو نسبة صغيرة.
أشهر الأسئلة المتعلقة بالتقويم والحمل
ازاي بيأثر غثيان و قيء الصباح على صحة الفم؟
قيء الصباح بيكون نسبة حموضته عالية، وأي شئ شديد الحموضة ممكن يتسبب في بعض التآكل للأسنان، وبالتالي صحة الفم كلها بتتأثر وبيزيد خطورة الإصابة بالتهاب اللثة.
فإذا كانت الحامل بتعاني من غثيان شديد في الصباح، فكل اللي تقدر تعمله هو ترطيب الفم بشكل دائم والمضمضة بماء فاتر، والأفضل انها تبعد عن تنظيف الأسنان بالفرشاة والمعجون بعد الغثيان مباشرة لأن دا ممكن يسبب إزالة طبقة مينا الأسنان الرقيقة وهيزيد من حساسية الأسنان؛ وممكن الانتظار حوالي 30 دقيقة بعد الغثيان وتبدأ الحامل في استخدام الفرشاة والمعجون بلطف.
ازاي اتجنب خطورة الإصابة بتسوس الأسنان أثناء الحمل؟
ممكن الحامل تتجنب زيادة نسبة خطورة الإصابة بالتسوس أثناء الحمل عن طريق انها تحافظ على الفم رطب وبعيد عن الجفاف، ودا لأن اللعاب بالفم بيساعد في غسل الأسنان من أي حمض زيادة أو من أي طعام ممكن يكون لازق على الأسنان وبالتالي بيقلل خطورة التآكل.
لكن في حالة لو الفم بيعاني من الجفاف، دا بيزيد من شدة التسوس بسبب تراكم الأطعمة، وبسبب تراكم الحمض الناتج عن غثيان الصباح.
وبوجود التقويم، بتزيد مشكلة التسوس نتيجة صعوبة تنظيف الأسنان وسهولة التصاق الطعام على جسم التقويم المعدني أو الأسلاك والفصوص، ودا ممكن يسبب ظهور بقع بيضا على الأسنان حوالين الجزء المعدني للتقويم، وبعد نهاية مدة التقويم هتلاحظ الحامل أن المكان دا تحديدًا لونه أتغير عن لون الأسنان الأصلي.
ازاي احافظ على صحة أسناني مع التقويم أثناء الحمل؟
في الحقيقة مش مطلوب من الحامل اتباع أي تعلميات صارمة أثناء الحمل مع التقويم إلا بعض التعليمات العادية زي:
- أن الفم يكون رطب دايمًا وتبعد قدر المستطاع عن جفاف الفم.
- تنظيف الفم والأسنان باستخدام فرشاة ناعمة ومعجون أسنان مناسب لحالة الأسنان، مع تحريك الفرشاة بلطف علشان تتجنب نزيف اللثة.
- استخدام مضمضة الفم الخالية من الكحول، تحت إشراف دكتور الأسنان.
- ممكن يتم استخدام غسول الفم المنزلي بالماء المالح الدافئ علشان تحارب بكتيريا الفم وتمنع تراكمها.
- أخذ الاحتياطات المناسبة زي عدم المجازفة وإجراء أنواع معينة من الأشعة خاصة في أشهر الجزء الأول والجزء التالت من الحمل.
- ممكن تحضير المحلول الملحي في المنزل من خلال استخدام ½ معلقة صغيرة من الملح الأبيض مع فنجان من الماء الفاتر بعد غليانه؛ والأحسن أن الوصفة دي يتم استخدامها حوالي 3 مرات في اليوم لكدة من 2 لـ 3 أسابيع لتقليل انتفاخ اللثة بسبب الحمل والتقويم.
ملحوظة: لازم استشارة دكتور الأسنان ودكتور النسا قبل استخدام أي وصفة أو أي دوا للحفاظ على صحة الأم والجنين.
ممكن تتعرفي معلومات أكتر عن التقويم في مقال أنواع وأسعار التقويم .. وممكن تتمتعي بـ استشارة مجانية لحالة أسنانك من خلال انك تبعتي لنا رسالة عن طريق الـ Whats app.